Чомчоевтар аан дойдуну кытта куйаар ситиминэн билсэр, кэпсэтэр кыахтаннылар

Ол көрсүһүүгэ Анатолий Игнатьевич кэргэнэ Диана Васильевна, оҕолоро тыл эппиттэрэ уонна боппуруостарга хоруйдаабыттара. Онтон мин адвокат киһи буоларым быһыытынан, силиэстийэ, суут төһө уһуннук барыан сөбүн, эмсэҕэлээччи доруобуйата айгыраабытын судебнай медицинскэй экспертиза быһаарарын, сокуон хараҕынан уорбаланааччылар эппиэккэ тардыллыахтаахтарын туһунан уонна норуот билинэр, убаастанар, ытыктанар Чомчоевтар дьиэ кэргэттэрэ элбэх научнай үлэни ыытар уһаайбаларын, ону тэҥэ бэйэлэрин государственнай көмүскэлгэ ылары туруорсар наадатын тоһоҕолоон быһааран биэрбитим. Билигин ыарахан кэмнэригэр юридическай сүбэннэн-аманнан көмөлөһө сылдьабын.

Пресс-конференцияҕа олорон аҕам саастаах, норуот убаастыыр, киэн туттар, биллиилээх дьоммут – урукку кэмҥэ Үөһээ Бүлүү улууһун аҕа баһылыга, байыаннай, биллиилээх эколог, учуонай Анатолий Игнатьевич уонна Бүлүү улууһуттан төрүттээх , биологическай наука кандидата Диана Васильевна Чомчоевтар дьиэ кэргэттэрэ бу сайдыылаах XXI үйэҕэ хайдах сибээһэ суох олороллорун сөхпүтүм. Дьиэ кэргэн хотуна Диана Васильевна Кэҥкэмэ үрэҕин кэрэ айылҕатын, быһылаан буолбут холомо дьиэтин, хаһаайыстыбатын хотонун, гарааһын көрдөрөн, саха боруода ынахтарын Суораттааҕы, кини оҕотун Сүөгэйдээҕи, 7 кууруссаларын билиһиннэрэ кэпсии сылдьан, сибээһэ суох хайдах олороҕут диэн боппуруоспар миэхэ эппитэ: “Тоҕойуом, Анатолий Игнатьевичтыын, оҕолордуун, дьүөгэлэрбинээн, аймахтарбынаан хайдах да сибээстэһэр кыаҕым суох, сотовай сибээс урут эрдэ баар эбит. Билигин куораты кытары сибээһэ суох куһаҕана бэрт, эрдэ сибээс киллэрэри ыйытан көрбүппүт даҕаны, элбэх үп наада диэбиттэрэ. Ону биһиги, икки пенсионер дьон, пенсиябытынан сатаан уйумматахпыт”. Саха Далбар хотунунаан Диана Васильевналыын билсэн баран, ийэм курдук чугастык ылынным.

Чомчоевтар аттыларыгар олорор билэр дьонум Татьяна Иннокентьевна Березина, Надежда Кирилловна Павлова, кинилэртэн чугас сайылыктаах Марина Платонова дьиэ кэргэттэрэ, онно эбии 35-с км чайнойга үлэлиир элбэх оҕолоох Татьяна Ивановна Лиханова уонна да атыттар сибээс ханнык да көрүҥэ суох олорон, чугас дьоннорун, аймахтарын, доҕотторун кытары билсэр кыахтара суоҕун, онтон сылтаан телефонунан кэпсэтэр, билсэр бырааптара күөмчүлэнэн олороллорун сөҕөн, эбиитин аҕам саастаах дьон эмискэ ыалдьар, туох эбит быһылаан буолар түбэлтэлэригэр сибээстэһэр кыахтара суоҕуттан хараастыбытым уонна сарсын, үлэ күнүттэн Бүлүүлүүр трасса 46-с биэрэстэтигэр Кэҥкэмэҕэ сибээс киллэрэри билэр дьоммунан хайаан да туруорустахпына, аҕам саастаах сахам дьонугар көмөлөстөхпүнэ сатанар диэн утуйбутум.

Сарсыарда тураат Өрөспүбүүлүкэбит Ил Дарханын Айсен Сергеевич Николаев көмөлөһөөччүтүгэр, 2018 с. Ил Дархан талыы быыбарыгар «Норуот итэҕэлин» уопсастыбаннай хамсааһыныгар бииргэ үлэлээбит Афанасий Иванович Ноевка эрийэн тиийэн, ытыктанар убайбыт Анатолий Игнатьевич Чомчоев уһаайбатыгар көҥүлэ суох киирэн саба түһэн өлөрө сатаабыттарын уонна Кэнкэмэҕэ сибээһэ суох олороллорун кэпсээтим, Ил Дархаммытыгар Айсен Сергеевичка тиэрдэригэр көмөлөһөрүн туһунан эттим. Афанасий Иванович уһуннук күүттэрбэтэ, СӨ сибээһин министрин Анатолий Семенов көмөлөһөөччүтүн Спиридон Сивцев телефонун нүөмэрин ыытта.

Эдэр кэскиллээх специалист Спиридон Сивцевы кытары кэпсэтэн, баар балаһыанньаны кэпсээн баран, сибээс министрыгар балаһыанньаны тиэрдэригэр эппитим. Сотору буолаат, сотовай сибээс холбонор кыахтааҕын сибээс министерствотын инженердэрэ быһаардылар диэн үтүө сонуну тиэрдибитэ. Ол кэннэ былырыын тэриллибит “РЦТР Арктик телеком” тэрилтэ дьарыктанар буолла диэн, директоры солбуйааччы, уруккута Губинскай уокурук салайааччытын, билэр киһим Максим Артемьев телефонун нүөмэрин биэрбитэ.

Максим Артемьев: “Үлэ саҕаланна, бүгүн сотовай сибээс, интернет  холбонор буолла, сарсын сэрэдэҕэ оборудованиетын туруоруохтара, холбоон боруобалаан көрүөхтэрэ, сотовайынан кэпсэтиэхпит” диэбитэ.

Бэҕэһээ, сэрэдэҕэ, үтүө күн үүнэн, өр сылларга кыаллыбакка турбут дьыала быһаарылынна, сибээһэ суох олорбут ытыктанар аҕам саастаах дьоммутугар Кэҥкэмэҕэ сотовай сибээс,  2 мегабит түргэннээх интернет, вайфай холбонор үөрүүлээх күнэ тосхойдо.

Түгэнинэн туһанан, өрөспүүбүлүкэбит Ил Дарханыгар Айсен Сергеевич Николаевка, көмөлөһөөччүтүгэр Афанасий Иванович Ноевка, СӨ сибээс министригэр Анатолий Аскалонович Семеновка, көмөлөһөөччүтүгэр Спиридон Сивцевка  уонна тоһоҕолоон туран “РЦТР Арктик телеком” директорыгар Виктор Александрович Сергеевка, директор сүбэһитигэр Максим Артемьевка  интернет киирэр оборудованиетын бэлэхтээбиттэригэр “Арктик телеком” инженердэригэр көрдөһүүбүтүн ылынан, аҕам саастаах дьоммут кыһалҕаларын өйдөөн, түргэнник көмөлөспүккүтүгэр улахан махталбын тиэрдэбин.

Түмүкпэр, ытыктабыллаах Анатолий Игнатьевичка чэгиэн доруобуйаны, элбэх чинчийэр ыытар научнай үлэҕитигэр үрдүк ситиһиилэри, дьиэ кэргэҥҥитигэр дьолу соргуну баҕарабын.